കൊടുങ്ങല്ലൂരിൽ നിന്ന് 6 കിലോമീറ്റർ അകലെ പെരിയാറിന്റെ തീരത്ത് സ്ഥിതി ചെയ്യുന്ന പ്രശസ്തമായ ഒരു തീർത്ഥാടന കേന്ദ്രമാണ് അഴീക്കോട് മാർത്തോമാ പന്തിഫിക്കൽ തീർത്ഥാടകേന്ദ്രം (Marthoma Syro-Malabar Pontifical Shrine, Azhikode). മുസിരിസ് പൈതൃക പദ്ധതിയുടെ കീഴിൽ വരുന്ന ഈ ദേവാലയം ക്രിസ്തുവിന്റെ ശിഷ്യനായ തോമാശ്ലീഹായുടെ സ്മരണകളുമായി ബന്ധപ്പെട്ടുകിടക്കുന്നു.

🕊️ ചരിത്ര പശ്ചാത്തലവും വിശേഷങ്ങളും:

• തോമാശ്ലീഹായുടെ ആഗമനം: ക്രിസ്തുവിന്റെ ശിഷ്യനായ തോമാശ്ലീഹാ എ.ഡി. 52 നവംബർ 21-നാണ് കേരളത്തിൽ കൊടുങ്ങല്ലൂരിൽ ആദ്യം എത്തിച്ചേർന്നത്. യഹൂദരും മുസ്ലീങ്ങളും വവസിച്ചിരുന്ന ഈ തീരപ്രദേശത്ത് അദ്ദേഹം സുവിശേഷം പ്രസംഗിക്കുകയും വിശ്വാസികളെ മാമ്മോദീസ മുക്കി ക്രിസ്തീയ സമൂഹത്തിന് രൂപം നൽകുകയും ചെയ്തു.
• ആദ്യ പള്ളി: തോമാശ്ലീഹാ കേരളത്തിൽ സ്ഥാപിച്ച ഏഴ് പള്ളികളിൽ ആദ്യത്തേത് അഴീക്കോട്ടെ ഈ മാർത്തോമാ പള്ളിയാണെന്ന് വിശ്വസിക്കപ്പെടുന്നു. എ.ഡി. 72-ൽ മൈലാപ്പൂരിൽവെച്ച് അദ്ദേഹം രക്തസാക്ഷിയാവുകയും, അദ്ദേഹത്തിന്റെ തിരുശേഷിപ്പ് പിന്നീട് എഡേസയിലേക്കും തുടർന്ന് ഇറ്റലിയിലെ ഓർടോണയിലേക്കും മാറ്റുകയുണ്ടായി.
• തിരുശേഷിപ്പും വാസ്തുവിദ്യയും: പഴയ കാലത്തെ നഗരത്തിന്റെയോ പള്ളിയുടെയോ അവശിഷ്ടങ്ങൾ ഇവിടെ ബാക്കിയില്ലെങ്കിലും, 1954 CE-ൽ ഇറ്റലിയിലെ ഓർടോണയിൽ നിന്നും തോമാശ്ലീഹായുടെ വലതു കൈയിലെ അസ്ഥിയുടെ ഒരു തിരുശേഷിപ്പ് വാങ്ങി ഇവിടെ കൊണ്ടുവരികയുണ്ടായി. പള്ളിയുടെ പ്രധാന വേദിക്കിപിറകിൽ വത്തിക്കാനിലെ സെന്റ് പീറ്റേഴ്സ് ബസിലിക്കയുടെ മാതൃകയിലാണ് ഈ മനോഹരമായ തീർത്ഥാടന കേന്ദ്രം നിർമ്മിച്ചിരിക്കുന്നത്. മതം, ജാതി വ്യത്യാസമില്ലാതെ ആയിരക്കണക്കിന് ആളുകളാണ് ഇവിടെയെത്തുന്നത്.
• മാർത്തോമാ സ്മൃതി തരംഗം: തോമാശ്ലീഹായുടെ ദൗത്യത്തെക്കുറിച്ചുള്ള ഹൃസ്വമായ വിവരങ്ങൾ നൽകുന്ന 35 മിനിറ്റ് ദൈർഘ്യമുള്ള ഒരു ഓഡിയോ-വിഷ്വൽ അവതരണമാണിത്. അദ്ദേഹത്തിന്റെ ഫലസ്തീനിലെ ജീവിതം, കൊടുങ്ങല്ലൂരിലേക്കുള്ള യാത്ര, ഇന്ത്യയിലെ അപ്പസ്തോലിക ദൗത്യം, മൈലാപ്പൂരിലെ മരണം, തിരുശേഷിപ്പ് കൊടുങ്ങല്ലൂരിൽ എത്തിച്ചത് തുടങ്ങിയ കാര്യങ്ങൾ ഇതിലൂടെ മനസ്സിലാക്കാം.