കൊടുങ്ങല്ലൂർ: കോട്ടപ്പുറം കായലിൽ പതിനായിരങ്ങളെ സാക്ഷിയാക്കി നടന്ന ചാമ്പ്യൻസ് ബോട്ട് ലീഗിന്റെ (സി.ബി.എൽ) ആവേശകരമായ മത്സരത്തിൽ മേൽപ്പാടം ചുണ്ടനിൽ തുഴയെറിഞ്ഞ പള്ളാത്തുരുത്തി ബോട്ട് ക്ലബ്ബ് ജേതാക്കളായി. മൈക്രോ സെക്കൻഡുകളുടെ വ്യത്യാസത്തിൽ അവസാന നിമിഷം വരെ നീണ്ടുനിന്ന വാശിയേറിയ മത്സരത്തിനൊടുവിലാണ് പള്ളാത്തുരുത്തി ബോട്ട് ക്ലബ്ബ് ഒന്നാം സ്ഥാനവും അഞ്ചു ലക്ഷം രൂപയുടെ സമ്മാനത്തുകയും സ്വന്തമാക്കിയത്.
അരോമ 1 ചുണ്ടനിൽ മത്സരിച്ച അരോമ ബോട്ട് ക്ലബ്ബ് (പരവൂർ, കൊല്ലം) രണ്ടാം സ്ഥാനവും (3 ലക്ഷം രൂപ), കൈനകരിയുടെ വീയപുരം ചുണ്ടൻ മൂന്നാം സ്ഥാനവും (1 ലക്ഷം രൂപ) കരസ്ഥമാക്കി.
ഇരുട്ടുകുത്തി വള്ളംകളി വിജയികൾ:
കോട്ടപ്പുറം ടൂറിസം ഡെവലപ്പ്മെന്റ് സൊസൈറ്റിയുടെ (കെ.ടി.ഡി.എസ്) ആഭിമുഖ്യത്തിൽ നടന്ന ഇരുട്ടുകുത്തി വള്ളംകളി മത്സരങ്ങളും കാണികളിൽ ആവേശം പകർന്നു.
- എ ഗ്രേഡ് വിഭാഗം: ‘ഗരുഡൻ’ ഒന്നാം സ്ഥാനവും, ‘സെന്റ് സെബാസ്റ്റ്യൻ നമ്പർ 1’ രണ്ടാം സ്ഥാനവും നേടി.
- ബി ഗ്രേഡ് വിഭാഗം: ‘ജിബി തട്ടകൻ’ ഒന്നാമതും ‘മടപ്ലാതുരുത്ത്’ രണ്ടാമതുമെത്തി. വിജയികൾക്ക് മുൻ മന്ത്രി വി.കെ. രാജൻ, കെ.ടി. കുഞ്ഞപ്പൻ, ടി.എ. ഗിരീഷ് കുമാർ എന്നിവരുടെ പേരിലുള്ള സ്മാരക ട്രോഫികൾ സമ്മാനിച്ചു.
ചാലക്കുടി എം.പി ബെന്നി ബെഹനാൻ പതാക ഉയർത്തുകയും ചടങ്ങിൽ മുഖ്യാതിഥിയാകുകയും ചെയ്തു. കായിക, യുവജനക്ഷേമ, രജിസ്ട്രേഷൻ വകുപ്പ് മന്ത്രി അഡ്വ. ഒ.ജെ. ജനീഷ് ബോട്ട് ക്ലബ്ബുകളുടെ വർണ്ണാഭമായ മാസ് ഡ്രിൽ ഫ്ലാഗ് ഓഫ് ചെയ്യുകയും വള്ളംകളി ഉദ്ഘാടനം ചെയ്യുകയും ചെയ്തു. ജില്ലാ കളക്ടർ ശിഖ സുരേന്ദ്രൻ സ്വാഗതവും കൊടുങ്ങല്ലൂർ നഗരസഭ ചെയർപേഴ്സൺ ഹണി പീതാംബരൻ അധ്യക്ഷതയും വഹിച്ചു.
സമാപന സമ്മേളനത്തിന്റെ ഉദ്ഘാടനവും വിജയികൾക്കുള്ള സമ്മാനദാനവും ടൂറിസം, സാംസ്കാരിക വകുപ്പ് മന്ത്രി പി.സി. വിഷ്ണുനാഥ് നിർവഹിച്ചു. മുസിരിസ് പൈതൃക പദ്ധതിയെ ലോകത്തിലെ തന്നെ ഏറ്റവും വലിയ പൈതൃക പദ്ധതിയായി മാറ്റാൻ സർക്കാർ തീവ്രശ്രമം നടത്തിവരികയാണെന്നും അടുത്ത വർഷമാകുമ്പോഴേക്കും വിദേശികളടക്കമുള്ള വലിയ പങ്കാളിത്തം ഉറപ്പാക്കുമെന്നും മന്ത്രി വ്യക്തമാക്കി. കെ.ടി.ഡി.എസ് പ്രസിഡന്റ് വി.എം. ജോണി, സെക്രട്ടറി ജോഷി ചക്കാമാട്ടിൽ, റൂറൽ എസ്.പി മുഹമ്മദ് നദീം തുടങ്ങിയവരും ചടങ്ങിൽ സന്നിഹിതരായിരുന്നു. ജലോത്സവത്തോടനുബന്ധിച്ച് നടന്ന വിവിധ കലാപരിപാടികളും ജനശ്രദ്ധ ആകർഷിച്ചു.
